الله معك...
بيخَبّرو عن رجّال كان يحِبّ الصيد كتير، بيَوم من الإيّام هوّي وعَم يتصيَّد بالغابة لاقى بيضة حمِلها مَعو عَ البيت، أخدِتها مَرتو يَللي كانِت عم بتقَعِّد قِرقَة وحَطِّتها تحتها مع كِلّ البيضات، بعد ٢١ يوم فَقّصو البيضات وفَقَّصِت مِتلهُن صوص، عاش صوص كِبِر وصار دجاجة.
بيوم من الإيّام كانِت عَم تَعمِل صُبحيِّة هيّي ودجاجة، جارتها بتشوف بالجوّ شي طاير بتقول لجارتها :
«غريب الإنسان شو تطَوَّر عِمِل طيّارة بتطير بالجَوّ».
بتقِلّها لدجاجة جارتها :
«هيدي مش طيارة هيدي متلك نسر».
المتفائلين بيقولو إنّو في حدا إجا كبّها بالجو طارت وبعد نتفة وِقعِت، كبّها من جديد طارت أكتر ووِقعِت، كبّها تالت مرَّة طارِت وبعدها طايرَة، المتشائمين قالوا :
«خِلقِت صوص عاشِت دجاجة وماتِت دجاجة». والله معك.
المصدر : صوت المحبّة
