الله معك...
صَبي عُمرو ٨ سنين حَصَل عَ جايزِة بالقراءة.
رِجِع عَ البيت مِفتِخِر ومَبسوط، فات عَ المَطبَخ وسأل الخادمِة الإسبانيِّة :
«بتِقدَري تُقري مِتلي أو أحسَن مِنّي، أنا أخَدِت جايزِة بالقراءة؟»
مِسكِت الخادمِة الكتاب وتطَلَّعِت في وقالِت :
«أنا ما بعرِف إقرا».
ركَض الوَلَد مَبسوط عِند بَيّو، وخَبَّرو شو صار :
«أنا اللي عُمري ٨ سنين بعرِف إقرا، وخادمِتنا اللي أكبَر مِنّي ما بتَعرِف.. قولَك شو حاسِّة هَلّق؟».
وصار يضحَك.
جاوَبو بَيّو هِيِّ حاسِّة مِتِلما إنتَ رَح تحِسّ بعد شوي.. وناوَلو كتاب بالإسبانيِّة وقَلّو :
«إقرأ».
سَكَت الصَبي، فَكَّر وفِهِم.
الزوّادة بتقلّي وبتقلَّك :
كِلّ مرَّة بتِفتِخِر وبتِتكَبَّر تذَكَّر قَول الكتاب :
«مَن يَفتَخِر فَليَفَتخِر بالربّ». والله معك.
المصدر : صوت المحبّة
