الله معك...
كانو آباء الكنيسة يقولو :
«ألله داعينا عَ ٣ موايد :
مائدة الكلمة، ومائدة القربان، ومائدة الفقير اللي هِيّ المدخل لمائدة الملكوت».
إذا كان بهالإيّام، عم نلَبّي الدعوِة عَ مائدِة الكلمة، من خِلال قراءة الإنجيل أو سماع كلمة ألله، وعَم نلَبّي الدعوِة عَ مائدة القربان من خلال الذبيحة الإلهيِّة، مدعوّين اليوم نلَبّي مِن كِلّ قلبنا الدعوِة لمائدِة الفقير :
يعني اليوم بكِلّ بساطَة، بدّنا نِفتَح خزاناتنا، نشوف عن شو فينا نتخَلّى، مش بس اللي فايض عنّا أو مش عايزينو أو مِش عَم نستَعملو.
الزوّادة اليوم بتقلّي وبتقلَّك :
لازم نشارِك الفَقير بشي مِن قلبنا، ومنَعرِف إنّو رح نلَبّي حاجِة الآخرين.
وما في حدا إلّا ما عندو شي بيِقدَر يشارِك فيه.
وبهالتخلّي، منكون جلسنا عَ مائدِة الفقير، والتقينا فيه وبصاحِب الدعوِة، واكتَمَلِت السعادِة، ومشينا بطريقنا لمائدِة الملكوت. والله معك.
المصدر : صوت المحبّة
