الله معك...
الزوّادة بتدعينا اليوم حتَّى قبل ما نطمَح بالإشيا الكبيرِة، خَلّينا نبَلِّش بالإشيا الزغيرِة اللي منعيشها كِلّ يوم.
كان في شاب عَم يِكتُب بعض الأفكار اللي عَم بتجول بخاطرو بالوقت اللي إمّو كانِت عَم تِكوي التياب.
وكانِت أفكارو :
إذا شِفِت حدا عَم يِغرَق، بزِتّ حالي بالمَيّ حتَّى خَلّصو.
إذا احتَرَق شي بَيت بهِبّ لنَجدِة الأطفال تَخَلُّصُهن مِن النار.
إذا صار في شي زلزال، رَح كون بَين أوَّل ناس بيخاطرو بحياتهُن تَ يِسعفو الآخرين.
وبَعدين رَح كَرِّس كل حياتي لخِدمِة الفُقَرا بالعالم...
وبتناديه إمّو :
ـ إذا بتريد يا ماما انزال عَ الدكّان وجيب ربطة خِبِز.
وبيجاوبها :
ـ ماما، مش شايفِة الدِني عَم بتشَتّي؟
الزوّادة بتقلّي وبتقلَّك :
شو رأيكُن، شو كان أحسَن لهالشاب، يفَكِّر كِلّ هالأفكار البطوليِّ أو يحَقِّق طَلَب زغير لإمّو؟. والله معك.
المصدر : صوت المحبّة
