الله معك...
بحياتنا اليَوميِّة منِتعَرَّف كتير عَ أشخاص جُدُد وإذا بَدنا نعَرِّف عنهُم بيكون المقياس : الطول، الشكل، الثقافِة، الغِنى...
إجا شَبّ لعند بَيّو وقال :
«يا بابا صار لازِم تروح تحكيلي بالعروس اللي بحبها».
سألو بَيّو :
«شو صفاتها؟»
قال الشبّ :
«حلوه»
رَدّ البَيّ :
«صفر».
«يا بابا معَلَّمِة ومثَقَّفِة»
جاوَب البَيّ :
«صفر»
«بنت عيله وستّ بَيت»
«صفر».
«لسانها دافي معها مصاري»
«صفر».
هون انقَطَع قلب الشَبّ وقال لَبَيّو :
«معقول شو بدك؟ ما البنت كاملِة الصِّفات؟»
بيجاوِب البَيّ :
«يا بَيّي هالبِنت تَقيِّة وبِتحِبّ أللّه؟»
ردّ الصّبي :
«نعم يا بَيّي معلوم»
قال البَيّ :
«هَلَّق حَطّ حَدّ كِلّ الصفورَة واحَد، وشِفلي شو بيَعملو، مليون ما هيك؟»
الزوّادة بتقلّي وبتقلَّك :
كِلّ النِّعَم بتِبقى صفر بلا نعمة الله اللي لمّا بتكون موجودِة بتخَلّيهُن يصيرو ملايين. والله معك.
المصدر : صوت المحبّة
