الله مَعكُن...


إحدى اللّوحات المشهورة بتصَوِّر يسوع بجنَينِة معَتّمة، بإيدو اليَمين حامِل قَنديل وبالشمال عَم بيدِقّ عَ باب من الخَشَب القَوي والسميك.


لمّا إنعَرَضِت هاللّوحة لأوَّل مرَّة بأحد المعارِض، واحَد مِن الزوّار توجَّه للرسّام بهالإنتِقاد : 

«بلَوحتَك فيه خطأ كبير، الباب ما إلو مسكِة».

«هيدا خطأ مقصود»

بيجاوِب الرسّام :

«هيدا باب القَلب البَشَري بيِنفَتَح بَسّ مِن جوّا».



الزوّادة بتقلّنا :

شو رأيكُن إخوتي نتفَحَّص أبواب قلوبنا اليَوم يِمكِن نحنا مفتِكرينها مفتوحة وهيّي بالعَكس مسَكَّرَة أحلى ما قول مختومِة بالشَّمع الأحمر.
خَلّونا نشَرِّع بواب قلوبنا لإستِقبال يسوع المسيح. والله مَعكُن.

المصدر : صوت المحبّة