الله معك...
ملِك مَنّو مآمِن بوجود الله، طَلَب من كلّ الحُكَما بالمَملَكِة إثبات وجود الربّ، بس الكِلّ فِشلو.
فلّاح بضيعَة بعيدِة كتير إجا لعند الملِك طَلَب مِنّو مَوعَد حَدّ النهر ليأكِّدلو إنّو الله موجود.
عَ الموعد وُصِل الملِك والحاشيِة واحتَشَد كِلّ الشَّعب، وبعد تأخير وُصِل الفلّاح.
قال الملِك : «تأخَّرت ٥ ساعات جزاءَك الموت».
قال الفلّاح :
«يا مولانا تأخَّرت لأنّو النَّهر هائج وما في مركَب معي لأقطع من مَيل لمَيل.
أنا وناطِر بشوف شجرة بتُنقُطِع عَ الأرض، بتِتحَوَّل لقطَع وبعدين بتتحَوَّل لمَركَب، فركِبِت فيه وجيت لعندَك!».
جاوَب الملِك : «اقتلوه شو هالسُّخريِة شجرة بتتحوَّل لمركب بلا أيّ عامِل ولا أيّ صانِع ومَصنَع»؟
جاوَب الفلّاح :
«يا مولانا من غير المُمكِن الشجرة تتحوَّل لمَركَب دون عامِل، كيف انوَجَد الكَون دون الله الخالِق»؟
وقتها آمَن الملِك إنّو الله مَوجود، صانِع الكَون ومحَوّلو لآيات من جمال.
الزوّادة بتقلّي وبتقلَّك :
الله هوّي خالِق الكَون وهوّي يَللي مكَوِّن كِلّ واحَد مِنّا ومحَوّلو لآيات تِشهَد لَوُجودو. والله معك.
المصدر : صوت المحبّة
