الله معك...
بيخَبّرو عن ناسِك كان عايش عَ قُمِّة جبل عالي، يصَلّي ويتأمَّل.
بعد فترَة من الزمن وبعد صعودو ونزولو للمدينِة مرّات كتيرِة، وسنين عديدِة، اكتَشَف إنّو صار ختيار ، قَرَّر إنّو يشتري حمار ينقُل علَيه غراضو، وهيك صار.
لمّا اشتَراه بَلَّش يهتَمّ فيه ويطعميه لدَرَجِة إنّو نِسي رَبّو ونِسي وقت الصّلا وصار الحمار شِغلو الشّاغِل.
بيَوم مِن الإيّام كان عَ الطريق، وِقِف قدّام بُحَيرَة لَيِشرَب هوّي والحمار، تطَلَّع بالمَيّ شاف وِجّو ضعيف، تعبان، قَرَّر يتطَلَّع مَرَّا تانيِة تأكَّد فِعلًا إنّو وِجّو ضعيف وتعبان، قَرَّر يفَتِّش عن السَبَب، واكتَشَف إنّو الإهتِمام بالحمار هُوّي سبب ضُعفو وإبتِعادو عن الله.
باع الحمار ورِجِع لحياة الصلا والتأمُّل.
الزوّادة بتقلّي وبتقلَّك :
بحياتنا اليوميِّة في مشاغِل كتيرِة بتِبعِدنا عن الله.
لازِم نتذَكَّر كلام المعَلِّم : أعطِ مال قَيْصَر لِقَيْصَر ومال الله لله.
المصدر : صوت المحبّة
