22 Nov
22Nov

الله معك...


بمنطقة جبليِّة باردة كتير، اعتَمَدو المسافرين طريقة تخَلّيهُن دافيين.


كانو يحَطّو فحم والِع وجَمر بوِعاء أو مرطبان ويسَكّروه منيح ويلِفّوه بشقفة ويحملوه تحت باطهُن.


تلات رجال كانو مسافرين من هَونيك، ومن بعد ما قَطَعو مسافة طويلِة، شافو ناس رح يموتو من البرد، وما معهُن شي يدَفّيهن.

ففَتَح الرجّال الأوَّل الوعاء تَبَعو وشَعَّل نار كبيرِة بالجَمرات اللي معو.


وكلّ اللي كانوا بردانين دِفيو وقِدرو يِرجعو عَ بيوتهُن بسلام...


وكَمَّلو طريقهُن.


بس الدني عَتَّمِت علَيهُن.


ولمّا صارو رح يضَيّعو الطَريق، فَتَح الرجّال التاني الوعاء تبعو، وَلَّع مشاعِل بالنار اللي مَعو وقِدرو يكَفّو طريقهُن بأمان.


وبعد شويّ، صار الرجّال التالِت يتضحَّك علَيهُن :

- يا أغبِيا، قَلُّن، كيف بتضَيّعو النار تَبَعكُن كرمال غَيركُن؟

وساعِتها قالولو :

- «فَرجينا إنتَ نارَك!»


ولَمّا فَتَح الوِعا تَبَعو، ما لاقى فيه إلّا رماد وفحم مُطفي.





الزوّادة بتقلّي وبتقلَّك :

الروح القُدُس، اللي ساكِن فينا، ممَلّينا مِن مواهبو، وكم مَرَّة نحنا منسَكِّر عَ هالمواهِب ومنخَلّيها مخبّايِة، ولا منستَفيد مِنها ولا منفيد.

خَلّينا نِستَعمِل هالمواهِب تَ نمَجِّد إسم إلهنا ونِعكُس وُجود الروح القُدُس بداخِلنا، دفا ونور للآخَرين، وما نِسمَح لأنانيِّتنا تُطفي نار العطاء اللي فينا. والله معك.


 المصدر : صوت المحبّة

تعليقات
* لن يتم نشر هذا البريد الإلكتروني على الموقع.