الله معك...


في باشِق وِقِع أسير بِشَرك صيّاد مِسكو ورَبَطلو إجرو بِحَبلِة ورَبَط الحَبلِة حَدّ قِنّ الدجاجات. 

وما عَجَبِتو العيشِة صار يحاوِل يطير ولَكِن الحَبِل خلّاه أسير. 

ومُحاولاتو بِقيِت مُستَمِرَّة لَحَدّ ما إنجَرَحِت إجرو جُرُح بَليغ وتنَتَّفِت كِلّ ريشات جوانحو. 

بالأخير رُضي بِعيشتو وتعَوَّد عَ أصحابو، سِكّان القِنّ، وعَجَبو أكلُن وصار دجاجِة مِتلُن.

ومع مرور الزَمَن، اهتَريِت الحَبلِة وكان بيِكفي خُطوِة زغيرِة حتَّى تُنقُطِع، بَسّ الباشِق ما عاد بَدّو يحاوِل يطير بالسما، فَضَّل يضَلّ دجاجِة وعايِش عَ الأرض.



الزوّادة بتقلّي وبتقلَّك :

إنتَ اللي عَم بتواجِه ضغوطات كتيرة بتشِدَّك للأرض وبتِمنَعَك تحَلِّق وتعَلّي، مَهما قويِت علَيك ما تِستَسلِم ولا تِتخاذَل، خَلّيك محافِظ عَ أصالتَك وجَوهَرَك الطَيِّب واللّ بيقَوّيك.

المصدر : صوت المحبّة