الله معك...
بيخَبّرو عن قصِّة إكتشاف كريستوف كولومبوس لأميركا وإعتقادو أنها الهند.
فبتدخُّل الكنيسة لهالمنطقة، وبيوقع إنقسام بإسبانيا بين تيّارين : واحد بقيادة كاهن وآخر بقيادة فيلسوف.
التّاني بيقول :
«إنّو شعب هالبلاد هنّي للإستعباد لأنُّن ما بيتصرَّفو متل البشر».
أمّا الأوَّل فبيقول :
«ميزِة الإنسان إنّو بيِضحَك، منجيب فرقَة بهلوانيِّة حتّى نكشُف أمرُن».
بس ما تِضحكو، بيقول المطران بالمحكمة :
«بيتأجَّل الحكم لأنّو ظَهَر إنُّن مِش بَشَر».
وهوّي نازِل بيوقَع عَ الأرض فبيتضَحَّكو.
الزوّادة بتقلّي وبتقلَّك :
إذا كِنت معَبِّس ما لازِم تتأخَّر ابتِسِم، الإبتسامِة ما بتأكِّد بسّ إنّو نحنا بَشَر إنَّما بتأكِّد حُضور الربّ بحياتنا. والله معك.
المصدر : صوت المحبّة
