الله معك...
الخبريِّة بتقول إنّو الملك إسكندر الكبير كان عندو قائد جيش جبان وما بيِقدر ياخُد موقَف بالأوقات الصعبِة.
اشتَكو عليه قادِة الجيش عند الإسكندر العظيم، زِعِل الملك وقرَّر إنّو لازِم يغيِّر شي بهالقائد.
صار يسأل عَنّو وتفاجأ إنّو إسمو إسكندر.
نَدَهلو وقَلّو :
«شو إسمَك؟»
جاوَب :
«إسكندر».
سألو :
«بتَعرِف أنا شو إسمي».
جاوب وقال :
«إسكندر».
ساعِتها قَلّو الملك العظيم :
«لازِم تغَيِّر أمر مِن تنَين، أو إسمَك أو تصَرُّفاتَك».
الزوّادة بتقلّي وبتقلَّك :
إنتِبِه المسيح القايِم من الموت واقِف قدّامَك وعَم بيقول :
«إنتَ مسيحي وحامِل إسمي يا بَدَّك تغَيِّر إسمَك، يا بَدَّك تغَيِّر تَصَرُّفاتَك».. ما تتأخَّر لازِم تِختار. والله معك.
المصدر : صوت المحبّة
