الله معك...
بيخَبرو عن رجّال مات وطُلِع عَ السَّما، وُصِل عَ أوَّل صالَة فيها عجقَة وناس كتار، سأل الملاك :
«هودي مين؟».
قَلّو :
«هَودي بيمَثلو النّاس يللي عَم يُطلبو من الله عَ الأرض».
ترك الصّالَة وراح عَ صالَة تانيِة، كمان شاف ناس كتار سألو :
«هَودي مين هِنّي؟».
قَلّو :
«هَودي عَم بينَفذو طَلَبات يَللي عَم يُطلبو عَ الأرض».
تَرَك الصّالَة وراح عَ صالَة تالتِة، شاف واحَد وحدو سألو :
«هيدا مين؟».
جاوَبو بحُزن كبير :
«هيدا عَم يشكر الله عَ نِعَمو وعطاياه».
الزوّادة بتذكِّرني وبتذَكرَك بقَول إحدى المُتَصَوِّفات :
«يا ربّ إذا بحبَّك خَوف من الجَحيم إحرقني فيها، وإذا بحِبَّك طَمعاً بالنعيم إحرِمني مِنّو وإذا بحِبَّك لأنَّك بَيّ ما تِمنَعني عَن حُبّك». والله معك.
المصدر : صوت المحبّة
