الله معك...
جرمانوس شَغّيل عند معَلِّم عَبّود وكل مشكلتو إنّو شويّ قليل الخصيِّه.
والمعلّم بيبَهدلو قدّام الكلّ.
هونيك نهار، طلب المعلِّم من شغّيلتو يزِقّو حجار.
لاحَظ جرمانوس إنّو معلمو واقِف عَ الشبّاك عم يتفَرَّج علَيُن، وقال بقلبو :
«حابِب اليوم خَلّي المعلِّم يغَيِّر نظرتو فيّي».
وبيقرّر جرمانوس يشِدّ حالو.
وبدل ما يِحمُل حجر واحد متل كِلّ الشغّيله، يِحمُل حجَرَين، وهيك بتكون فُرصة إلو إنّو معلِّم عبّود يبطِّل يقول عَنّو قليل الهمّة.
وهيك صار ! بس شو!
لمّا تطَلَّع المعلّم عبّود وشاف جرمانوس حامل حجرين، بيُصرُخ من فوق وبيقِلّو :
- يا جرمانوس! كِنت قَليل الخَصيِّة وهَيك رح تضَلّ!
ما إلَك جلادِة ترجَع مشوار تاني وعم تِحمُل حجَرَين تَ تخَلِّص بسرعة.
وكانِت هالكلمة متل الزّاعقة بقلب جرمانوس، حَطَّمِتلو كِلّ عَزيمتو.
الزوّادة بتقلّي وبتقلَّك :
لازِم تكون مشَجِّع لكِلّ يَللي حوالَيك إذا في حدا مقَصِّر وتحاوِل تساعدو يقوم من ضُعفو، ومِن غَلَطو، حتَّى يصير عَندو قابلِيِّة ورغبِة حقيقيِّة إنّو يتقَدَّم صَوب الأفضل. والله معك.
المصدر : صوت المحبّة
