الله معك...
شَبّ راح عند الأب أنسالم، وسألو :
«كيف بَدّي حِبّ اللّه؟».
قالَ الشَبّ : «قدَّمت لألله أفكاري وصلَواتي، شِغلي وتَعَبي إنّما بعدني حاسِس إنّي بعيد عَنّو، شو لازِم قَدِّملو بعد؟».
جاوَب الأب أنسالم :
«كان في مَلِك بَدّو يجَوِّز بِنتو، وهِّي أصَرِّت ما تتجَوَّز إلّا العَريس اللي بيقَدِّملها أحلى وأغلى هديِّة.
تقَدَّمو العِرسان وكانِت كِلّ مَرَّة تُرفُضُن لأنّو ما تعجِبها الهديِّة.
حتَّى إجا شَبّ وإيدَيه فاضيين، سألِتو :
«ما عندك شي تقدِّملي يّاه؟».
جاوَبها :
«جايي قَدِّملك ذاتي وبس تبادليني الهديِّة بُقدَر قَدِّملك كِلّ شي».
الزوّادة بتقلّي وبتقلَّك :
«يا إبني بتِقدَر تَعطي الله كلّ شي لمّا بتتعَلَّم تِقبَل مِنّو كلّ شي».
الزوّادة بتقلَّك أحلى هديِّة بتقَدِّمها للربّ هيّي إنَّك تقَدِّملو ذاتَك، مِتِل ما هوّي بَذَل ذاتو كرمالَك عَ الصليب. والله معك.
المصدر : صوت المحبّة
