الله معك...
صبيِّة عُمرها ٢٠ سنة شافِت نفسها بِشعَة فطَلَبِت الجمال، وفَكَّرِت إنها رَح بتلاقيه بِمُستَحضرات التجميل، إنَّما خاب ظنّها، خَبَّروها عن نبع إذا اغتَسَلِت فيه بيزيد جمالها.
راحِت عَ النبع ومع الأسف ما سَمَحلها النبع إنّو تِنزَل فيه، إنَّما طَلَب مِنها إنّو تقوم بأعمال حَسَنِة طوال شهر.
راحِت وما عِملِت مِتِلما طَلَب مِنها النَبِع.
رِجعِت لَعَندو إنَّما ما سَمَحلها تِغتِسِل فيه، لا بَل جَدَّد المِهلِة لشَهرَين، فقامِت بخطوِة ولكِن غير كافيِة، ومِن جديد رَفَض النَبع وجَدَّد هالمَرَّة لمِدِّة أشهُر.
وخِلالها حَقَّقِت أمور جميلِة جِدًّا، مِن مُساعَدِة وحَسَنات وصلَوات، و وقت اللي وُصلِت لنبع وبدها إنّو تِغتِسِل فيه، شافِت صورِة إنسان تاني بالمَيّ، فَسَأَلِت النبع عن السِرّ جاوَبها :
«الأعمال يَللي عمِلتيها هيّي يَللي جَمَّلِتلِك قَلبِك وخَلِّتِّك تصيري إنسان جديد وجميل المَنظَر».
الزوّادة بتقلّي وبتقلَّك :
كَتِّر مِن الأعمال الصالحَة والحَسَنِة بيِتجَمَّل قلبَك، وما علَيك إلّا تِتذكَّر دايمًا مِن فَيض القَلب يَنطُق اللِّسان والإناء يَنضَح بِما فيه. والله معك.
المصدر : صوت المحبّة
