الله معك...
كاهِن بوذي مِن اللي بيعيشو مِن عطايا الناس، قَرَّر بيَوم يِستَبدِل تَوبو بتياب شِحّاد، وضَهَر يستَعطي.
وشو كانِت دَهشتو كبيرِة لمّا كان يشوف الناس يِمرقو من حَدّو وما حَدا يلتِفِت صَوبو.
ورِجِع لِبِس تَوبو وقَعَد بذات المطرح.
وقدَّيش كانِت دَهشتو أكبَر لمّا صارو الناس يتسابَقو حتَّى يقَدّمولو الهدايا لأنّو عِرفوه مِن تَوبو.
ولمّا بالمسا رِجِع عَ البيت، خَلَع تَوبو ورَكَع قِدّامو يمَجّدو ويِشكرو ويقِلّو :
- بشكرَك عَ كِلّ العطايا اللي وِصْلِتْلِي عن طريقَك ، بشكرَك عَ كِلّ التِكريم اللي إنتَ سَبَبو، عَ كِلّ الإهتِمام اللي حصُلت عليه بِسَبَبَك.
اليوم عرِفِت إنّو بِدونَك أنا ما بِسوا شي.
الزوّادة بتقلّي وبتقلَّك :
شو رأيَك اليَوم إنتَ تِسأل حالَك شو التَوب اللي لابسو : مركزك؟ عِلمَك؟ ثَروتَك؟ جمالَك؟ قوتَك؟
جَرِّب اليَوم إنَّك تُطلَع مِنُّن وشوف شو بيِبقى.
إذا اللي بيِبقى راضيك وجَوهَري، عَفاك : بَعدَك إنتَ أهَمّ مِن إلتَوب اللي لابسو.
لكن، إذا ما بِقي شي، راجِع حساباتَك، وحاوِل بَدِّل هالتَوب العياري، تِلبُس إنسان جديد وقِيَم جديدِة، بتِرجع حياتَك إلها معنى. والله معك.
المصدر : صوت المحبّة
