نهر الدانوب بيصُبّ بالبحر الأسود، إنَّما قبل ما يوصَل بيكون قَطَع حوالي ٣٠٠٠ كلم، وتجاوز سبع حدود، ومرق بأراضي وضِيَع ومُدُن وعواصِم.
وبالرُّغم مِن كِلّ هالمُغامَرَة، مَنبَع الدانوب كتير متواضِع، مَنبَعو مِش تلوج مِتِل نهر السين أو الرين، إنَّما سواقي تواعَدِت مع بَعضها بفَرد قنايِة. وهالمَيّ عَم تِمشي خفيفة ومتواضعَة، وهِيّي مِش عارفِة إنها رَح تصير تاني أكبر نهر بأوروبا.
الزوّادة بتقلّي وبتقلَّك :
وهيك حياتنا، حياتنا متواضعة وسريعة العَطَب، إنَّما هيّي كمان عَم تِمشي عبر حدود الموت، مِش صوب البحر الأسود إنَّما صَوب بُكرا مع الله كِلّو نور. والله معك.
