الله معك...
كان القدّيس دومينيك عبد الأحد راكِع بغُرفتو عَم بيصَلّي للآب السماوي.
قال للربّ :
«يا ربّ بحِبّ قَدِّملَك كِلّ العالَم، كِلّ الكُره الأرضيِّة وكِلّ المخلوقات!».
جاوَب الربّ :
«أنا يَللي خَلَقت العالَم».
كَمَّل الصلا وقال :
«يا ربّ بحِبّ قَدِّملَك كِلّ حياتي!».
جاوَب الربّ :
«بُشكرَك بَس أنا يَللي وَهَبتَك الحياة».
قَلّو :
«طَيِّب يا ربّ بَدّي قَدِّملَك كِلّ خطاياي»...
جاوب الربّ :
«هيدا يَللي مِن صُنعَك وهَيدا يَللي بَدّي ياه... لأنّي عطَيتَك كِلّ شي ما عَدا الخَطِيِّة».
الزوّادة بتقلّي وبتقلَّك :
كِلّ شي عَنّا هوّي هديِّة مِن الربّ.
الشَغلِة الوحيدِة يَللي مِنّا هيّي خطِيِّتنا، خَلّينا نقَدِّملو ياها ونقِلّو :
يا ربّ خطينا قدّام السما وقدّامَك، سامِحنا. والله معك.
المصدر : صوت المحبّة
