الله معك...
منُقرا أوقات ع أوراق : من فضلكم ما ترسلو ورد، فكرو بالأولاد المُعاقين.
فُكرة كتير مهمِّة، بتِعني إنّو لازِم نتصرَّف تجاه الأحياء مش بس تجاه الأموات.
إذا كمَّلنا التفكير، بتِقدر الجملة تصير :
ما تنطرو حتَّى تبعتولو وردة لمّا بيموت، وَدّولو هلَّق كلمِة بتعَبِّر عن الحُبّ، عن الصداقة.
وحتَّى من دون ما توَدّي كلمة، قولها هلَّق، في كلمات إذا نَطَرت حتَّى تنقال بتصير صالحَة تنكَتَب عَ القبر.
الزوّادة بتقلّي وبتقلَّك :
الإنسان مش بحاجِة لتأبين بعد مَوتو، إنَّما أثناء حياتو. والله معك.
المصدر : صوت المحبّة
