الله معك...
شو معتَّر الإنسان لليَوم بَعدو ما بيَعرِف إنّو بسّ يموت ما بياخُد مَعو إلّا أعمالو الصالحة!
بيخَبّرو عن رجّال مات وطُلِع عَ السَّما، وكان حامِل مَعو كيس عَ ضَهرو، حاوَل يفوت عَ السَّما بسّ الكيس ما كان عَم يفوت مَعو مِن الباب، عَيَّطلو الربّ وقَلّو :
«يا إبني باب السَّما ضَيِّق مِن غَير المُمكِن تفوت إنتَ وهالكيس اللي مجَمَّع فيه كِلّ الأغراض الأرضيِّة، ما فيك تدَخِّل مَعَك إلّا أعمالَك الصالحَة».
الزوّادة بتقلّي وبتقلَّك :
ما تفَكِّر شو بَدَّك تاخُد مَعَك بَس تموت، كَتِّر مِن أعمالَك الصالحَة، هِيّي يَللي رح تِسبَقَك عَ السَّما. والله معك.
المصدر : صوت المحبّة
