الله معك...
هُموم ومشاكِل وأفكار سَودا بتلاحِقنا كِلّ النهار وكِلّ الليل.
شِغِل كتير وتَعَب كتير وما في وقت لحَدا حتَّى لألله اللي هوّي خَلَقنا وعَطانا الحياة.
قال عصفورَين عَم يتحادَثو سَوا عَ حَفِّة بلكون، قال الأوَّل :
«شايِف هالناس كيفهُن مهمومين وراكضين، قولك شو بِهُن؟».
بيجاوِب التاني :
«يِمكِن ما عندُن بَيّ يهتَمّ فيهُن مِتِل بَيّنا اللي بيِهتَمّ فينا بالسما».
الزوّادة بتدعينا اليوم :
نوقَف لحظَة بعجقِتنا ونَعمِل كِلّ شي بوَقتو بدون ما نُخلُط الأوقات، ونتذَكَّر إنّو الله بَيّنا حاضِر، حاضِر دايمًا ليِهتَمّ فينا ويَعطينا خبزنا اليومي الجسدي والروحي، لكِنّ المُهِمّ إنّو نحنا نعرِف هالحقيقَة ونُطلُب مِنّو أوَّلًا الملكوت وكِلّ الباقي رح ينزاد بدون طلب. والله معك.
المصدر : صوت المحبّة
