الله معك...
أحد حكّام أثينا قال لإبنو :
«إنت يا إبني أقوى رجّال ببلاد الإغريق».
تعجَّب الصّبي وقَلّو :
«مُمكِن تِشرَحلي هالأمر وكيف عرِفِت هالشي؟»
جاوَب البَيّ وقال :
«أهل أثينا بيِحِكمو بلاد اليونان، وأنا بِحكُم أثينا، وإمَّك بتِحكِمني، وإنتَ بتِحكُم إمَّك...».
الزوّادة بتقلّي وبتقلَّك :
مهما كبِرنا وكِبِر مقامنا بيضَلّ الربّ هوّي الأقوى، وهوّي الحاكِم والحَكَم وهوّي فوق الكِلّ، تذَكَّر قَول الشاعِر :
«ما مِن يدٍ إلّا ويد الله فوقها». والله معك.
المصدر : صوت المحبّة
