الله معك...

إنتَ يَللي متشَجِّع وبتقول دايمًا أنا بعمل شو ما بَدّو الربّ، ما بعمل إلّا إرادتو ومشيئتو إلَك هالخبريِّة :

بيقولو إنّو في رِجّال كان عم يتصَيَّد بالغابِة وكانِت كِلّ الأرضِ مغطّاية بالتَلج، هوّي وراجِع عَ بَيتو وكانِت عَم بتعَتِّم، زحَّط وِقِع ولاقى حالو متمَسِّك بشِلح، بيبَلِّش يُصرُخ ويقول :

«يا ربّ ساعِدني دَخيلَك ساعِدني قِلّي شو لازِم أعمِل مِش حابِب موت». 

بيِسمَع صوت عَم بيقِلّو :

«إذا بدَّك تِخلَص تروك الشِّلح يَللي ماسكو بإيدَك».

بيقِلّوا :

«إترُك الشِّلح؟ ما في عندَك حَلّ تاني»

وما بيِترُك الشِّلح بيِتجَمَّد وبيموت.

الصُبُح بيِجو أهل الضيعَة يفَتشو عليه، بيلاقوه مَيِّت متجَمِّد بيُفصُل بَينو وبَين الأرض ١٠ سنتم...


الزوّادة بتقلّي وبتقلّك :

إنتَ المِتحَمِّس عَ مِثال بطرس وبِتقول :

«إذا رُحت يا ربّ إلى الموت أنا رايِح مَعَك»، راجِع حساباتَك قدَّيش عَم تِسمَع كلامو وتَعمِل فيه أو عَم تَعمِل إرادتَك وعَم بتقول هَيدي إرادتو. والله معك.

المصدر : صوت المحبّة