الله معك...
بتقول الأسطورة الهنديِّة إنّو كِلّ الناس كانو بالأوَّل آلهة عِندُن قدرات خارقَة لأعمال عظيمِة.
لَكِن الناس ما عِرفو يستَخدمو قُدُراتُن، مِمّا دَفَع كبير الآلهة براهما إنّو ياخِدها منهُم ويخفيها.
بس وين؟
بأعلى الجبال؟!
قادِر يوصَل الإنسان.
بأعماق البِحار؟!
قادِر يوصَل، ما في مطرَح عَ وِجّ الأرض إلّا ما قادِر يوصَلّو.
مِن بعد تفكير طويل قرَّر براهما إنّو يخفي هالقُدُرات العظيمِة بأعماق نفس الإنسان، لأنّو ما رَح يفَكِّر أبداً يبحَث عنها بهالمكان.
الزوّادة بتقلّي وبتقلَّك :
كِلّ واحَد مِنّا بيجهَد وبيشقى تَ يلاقي كَنزو بهالدِّني، ومِش عارِف إنّو الله تارِك لَكِلّ إنسان كنز بأعماق نفسو.
إنتَ عندَك طاقات بداخلَك يمكِن بعد ما إكتشفتها مختِلفِة عن طاقات جارَك.
دَعوتي إلَك اليوم توقَف لحظك وتحاوِل تكتِشِفها.
حاوِل تِكتِشِفها وتِستَثمِرها وتحَقِّق الرسالِة اللي سَلَّمَك ايّاها الله عَ الأرض.
إستَثمِر كَنزَك بتخَلّي العالَم اللي حوالَيك يصير أحسَن وأحلى. والله معك.
المصدر : صوت المحبّة
