هيدا هوي اليوم اللي صنعو الربّ، يوم الأحد، يوم القيامة اللي منتذكّرو ومنعيشو بكل أحد منتقدّم فيه من سرّ الإفخارستيا تا نسبّحك ونمجّدك ونشكرك على حبّك اللي ما بينتهي.
يا ربّي يسوع، كلّ إنسان بيآمن فيك إيمان حقيقي، بيحلم إنّو يحلّ ملكوتك بالعالم، ولمّن بتطرد الشياطين اللي بتكون عم تتحكّم بالإنسان ، هيدا دليل على إنّك جيت عا أرضنا ومعك وفيك حلّ الملكوت بالعالم، لهيك نحنا كل يوم منرفعلك قلوبنا وعقولنا وأفكارنا تا نطلب إنّو يحلّ ملكوتك فيها.
يا ربّي يسوع، ويننا نحنا من ملكوتك؟ ويننا منّك؟ إنت اللي بتتركلنا الحرّيّة نختار إذا منعيش ملكوتك أو منستسلم لروح العالم، ونخلي علاقتنا فيك تفتر، ونحنا إخترناك يا ربّ تا نكون أبناء وبنات الله الآب ومهمّتنا نعيش رسالتنا بكل إيمان وأمانة.
/الخوري يوسف بركات/
