مبارك إنت يا ربّ، وممجّد بعجايبك، ومسبّح بخليقتك اللي كوّنتا بكلمة منّك يا إله السما والأرض.
يا يسوع الحبيب، ما في اجمل وأهمّ من وصيتك اللي وصّيتنا ياها، وهيي المحبّة بلا حدود، محبّتك اللي بتتجلّى بمحبّتنا لبعضنا البعض.
يا ربّي يسوع، كل الوصايا والقوانين اللي سبق الأنبيا وحطّوها بوحي من الروح، إكتملت بالمحبّة، هالوصيّة العظمى اللي خبّرتنا عنّا وعشتا قدّامنا ودعيتنا على إننا نحنا كمان نعيشا ونكمّل مشوارك عا أرضنا.
يا إلهنا الحبيب، بالمحبّة المجّانيّة اللي حبّيتنا ياها، رح نحاول إننا نعيش التواصل، أول شي بيننا وبين ذاتنا، وتاني شي بيننا وبين إخوتنا اللي عم نلتقي فيون كل يوم، ونبعد عن الأنانية اللي ما بتجيب للإنسان إلاّ الحقد والتسلّط والبعد عنّك وعن الإنسان، وبتجرحلك قلبك.
/الخوري يوسف بركات/
