سبحانك يا ربّ السما والأرض، قدّيشك كريم وكلّك محبّة وحنان تا كل صباح بتشرق علينا نورك وبتملينا حياة بنهار جديد.
شو حلوة البشارة فيك يا ربّ، وشو صعبة ومليانة خطورة.
هيّنة إننا نحكي عنّك يا يسوع وعن حياتك، من تجسّدك لميلادك لعمادك لبشارتك لآلامك وصلبك وموتك وقيامتك وصعودك للسما، بس الصعوبة والقوّة إننا نعرف نعيشك بين الناس متل ما دعيت تلاميذك ورسلك إنّن يعيشو.
كل الوقت منقول نحنا مسيحيين، يا ربّ ومنكتفي بهالكلام والتفاخر عالآخرين، ووقت الجدّ منبعد ومنهرب لأننا منخاف نواجه التجارب، ومنوقع فيا ومنسمحلا إنها تتحكّم فينا.
صعبة إننا ما نضيّع بهالعالم يا ربّ، بس روحك القدّوس هوّي سندنا، ومعو رح نمشي الدرب وكل هدفنا كيف نعكس حبّك بالعالم.
/الخوري يوسف بركات/
