22 May
22May

بصباح هالأحد المبارك، منرفعلك أجمل أناشيد التسبيح يا إلهنا الحبيب، ومنعظّمك ومنبارك إسمك بكل لحظة بتشرق فيها علينا من نورك.

شو حلو هالسلام اللي عطيتو لتلاميذك يا ربّي يسوع وقت ظهرت عليون بعد قيامتك من بين الأموات.

سلامك يا ربّ ما بيزرع بقلوبنا إلاّ الفرح والطمأنينة والإستقرار رغم كل الإضطرابات اللي عم تحاول تستولي على مجتمعاتنا.

سلامك يا يسوع اللي عطيتو للرسل بعد قيامتك، عطاهن أمل جديد بالرسالة، رسالة المحبة والغفران، اللي دعيتن إنن يعيشوها بين العالم اللي حوالَيون.

سلامك يا يسوع، فتح عقول التلاميذ تا يفهمو كل الكتب اللي بتحكي عن مجدك، وراحو يبشرو فيك ويدعو للرحمة والمغفرة ويعيشوهن شهادة بحياتن.

ونحنا يا ربّ، اللي زرعت سلامك فينا، بدنا نبقى محافظين عا هالسلام، ونعيشو بحياتنا شهادة لإلك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.