بنهاية هالأسبوع المبارك، منرفعلك يا ربّ كل التسبيح والمجد والإكرام ، ومنشكرك على حبّك الكبير اللي بتحبّنا إياه.
يا ربّ، بحياتك عا هالأرض خبّرت تلاميذك، وبتخبّرنا من خلالن، إنّو العالم رح يضطهدن، والغيرة رح تلعب دورا بالنفوس، والحقد والحسد والنميمة رح بيحاولو يتغلغلو بالجماعات الرسوليّة.
أكيد يا رب رح نتلاقى بأشخاص متل رؤسا الكهنة والفريسيّين، رسالتن شي وهمّن شي تاني، مليانين غيرة وحقد، بس نحنا بدنا نعيش الرسالة اللي عم تدعينا عليها، وبدنا نحط كلّ همّنا كيف نوصّلك لكل إنسان منلتقي فيه وبحاجة لإلك ولحبّك.
يا ربّ، ما بدنا نكون متل الكتبة والفريسيين، عم نعيش الدينونة ونصير نحكم عالآخرين ونصنّفن بين خاطيين وقدّيسين، ما بدنا نكون ديّانين لا بل رسل سلام ومحبّة.
/الخوري يوسف بركات/
