بصباح هالنهار المبارك، كل التسبيح والتمجيد والشكر بيليقو فيك وحدك يا إله السما والأرض.
قرّب العيد يا ربّي يسوع، عيد تجسّدك بحياتنا، عيد ميلادك بقلوبنا وبالعالم، ونيالن كل اللي بينطروك بفرح وقلوبن متشوّقة تا تلتقي فيك، وأفكارن متعطّشة لحضورك.
إنت يا ربّي يسوع النبع اللي بيرجّع للضايع بالحياة توازنو، وإنت المَيّ الحيّ اللي بيروي العطشان بعد ما جفّفتو الخطيّة.
إنت يا ربّي يسوع اللي منّك بتتدفّق أنهار ماء الحياة لكل اللي بيآمن فيك، ونحنا منن، تا نصير بدورنا ينابيع نروي غيرنا من فيض غناك ومن نبعك الأبديّ اللي عم يتفجّر علينا حبّ منّك ومن الآب والروح القدس.
/الخوري يوسف بركات/
