مع نهاية هالأسبوع المبارك، وبصباح هالنهار، منرفعلك يا ربّ كل التسبيح والمجد والإكرام.
عظيم إنت يا ربّ، إنت الكائن من قبل إبراهيم بيّ المؤمنين، من الأزل إنت يا يسوع إبن الله الحيّ، وإنت كيان كل اللي بيآمنو فيك، ونحنا منن.
عظيم إنت يا ربّي يسوع، وضعيف إنت يا هالإنسان اللي بعدك سطحيّ وما عم تعرف تفوت للعمق، مطرح ما الربّ ناطرك تا تفوت معو بعلاقة حبّ متبادل.
ويننا نحنا البشر اللي بعدنا عم نحط عوائق بيننا وبين الربّ اللي حبّنا وبعدو بيحبّنا وعاطينا ذاتو، وتاركلنا الحرّية نعمل اللي بدنا ياه؟ ويننا من هالحبّ العظيم اللي وصّل إلهنا إنّو يموت عالصليب كرمالنا؟
يا يسوعنا الحبيب، معك حياتنا بتلاقي معناها، ومن دونك نحنا للعدم، إنت سلامنا وفرحنا وأماننا.
/الخوري يوسف بركات/
