طلّ الصباح، وهلّ نورك علينا يا إله المحبّة والحنان، منسبّحك بهالنهار ومنشكرك لأنّك دايماً حاططنا بقلبك المليان رحمة.
يا ربّي يسوع، دايماً وبكل أمثالك بتتركلنا ملكوت السما بحالة نمو، تا ننمى فيه بنعمة الروح القدس إذا قبلنا إنّو يشتغل فينا ويساعدنا.
ودايماً بأمثالك اللي تحكينا فيها عن الزرع، يا ربّي يسوع، بتدعينا نكون الأرض الجيّدة، ونحنا بأنانيّتنا وشهواتنا منفسد هالأرض ومنحوّلا أرض صخرية وشوكية، بدل ما نعطي سنابل وقمح وتزهر حياة، منصير متكبّشين بالخطية اللي بتخنق فينا روحك.
تعا يا روح الله القدّوس ، ونمّي فينا الشجاعة تا نخطي الخطوة الأساسية اللي بترفض الشيطان وقوّاتو وتجاربو، ونتقرّب أكتر وأكتر من سرّ التوبة، ونتعمّق أكتر وأكتر بكلمة الله ونتأمّل فيها عا رواق، وناخدا مشروع قداستنا، وساعتا بتثمر وحدا فرح وحب الربّ.
/الخوري يوسف بركات/
