شو حلو لمّن منشوف الخليقة اللي كوّنتا بكلمة منّك، يا ربّ، عم بتسبّحك وتمجّدك، كل حدا على طريقتو.
نحنا مين يا ربّ تا حتّى عطيتنا ذاتك ومتت كرمالنا عالصليب؟
نحنا اللي جعلتنا أبناء وبنات النور الوكلاء على نشر حبّك وسلامك بالعالم.
نحنا مين يا ربّ تا حتّى صرت العبد المتألّم اللي إنجرح وتألّم وإنصلب كرمال حرّيّتنا؟
نحنا اللي عطيتنا الشرف إننا نكون العبيد الأمناء والحكماء تا نقدّم خدمة الأسرار بوقتا تا تكون زاد وزوّادة على طريق السما وعزا وراجا لكل إنسان عم يطلب الخلاص.
أعطينا يا ربّ إننا نتعمّق أكتر وأكتر فيك، ونتقرّب دايماً من مايدتك المليانة حياة، ونتحضّر تا نشوفك بالوليمة السماويّة، لمّن بتدعينا، مطرح ما في التسبيح الأبديّ والشكر الدايم على حرّية أبناء وبنات الله اللي أنعمت فيها علينا، الك المجد للأبد. آميـــــــن.
/الخوري يوسف بركات/
