بصباح هالنهار الفارح والمليان من نورك، منرفعلك يا رب كل التسبيح والمجد والإكرام، ومنشكرك على هالنهار الجديد اللي بتشرقو علينا.
يا ربّي يسوع، لمّن منقرا اللي صار بسدوم، منعرف إنّك بتحذّرنا من خلالن إنّو نخاف عا مصيرنا لا يصير متل مصيرن إذا تمرّدنا عالنعمة.
يا يسوع، إله الرحمة، ما في أجمل من إننا نتخلى عن ذاتنا ونعمل فعل توبة حقيقيّة وصادقة، ونبدّل حياتنا من فيض حبّك.
يا يسوعنا الحبيب، نحنا منعرف قدّيش بتحبّنا وبتبرّم بكل الوسايل تا تنجّينا إذا قبلنا إننا نتفاعل معك.
منسلّمك اليوم يا ربّ كل ذاتنا، وبدنا ياك توعّينا أكتر وأكتر تا نتغلّب عا أهواءنا وضعفنا، تا نعيش بفرح معك بكل شي منعملو، ونختبر حبّك لإلنا.
/الخوري يوسف بركات/
