من زمان و عا سبيل النكتة صار يوصلنا عا تلفوناتنا قصة chaperon rouge بس عا لسان حفيدو للذئب عم يدافع عن جدو و يقول إنّو مظلوم.

بالقصة اللي كلنا منعرفها و منخبرها لولادنا إنّو الذئب هوي الشرير.

خبرية الذئب الزغير بتقول إنّو جدّو كان كتير منيح و حتى ما كان ياكل لحمة كان بس ياكل حشيش بس chaperon rouge تجي تقطفن و و تنتفن و هوي يترجاها يقلا يا عمو بليز خليلي شي آكلو و هيي ما ترد و تصير تدعسلو أكلاتو قصد.

قام قرّر يروح يحكي ستها تا يتفاهم معها لأنو هيي زغيرة بس ستها شريرة أكتر منها و ضربت الذئب وقعتو إجا عم يقوم تا يفل لأنو زعل كتير قامت الست شافت صياد مارق صارت تصرخ ساعدنا ساعدنا الذئب بدو ياكلنا!

من وين إجت هالفكرة عا راسها!
و إجا الصياد قوّص الذئب...


زوادتنا اليوم مش هدفها تخبركن القصة اللي كلكن بتعرفوها بس هدفها تقلكن إنّو كل خبرية إلها وجّين و وجهتين نظر ولا مرة تحكمو عا حدا بلا ما عالقليلة تسمعو رأيو و تخلوه يدافع عن حالو يمكن يكون مظلوم! والله معكن...



#خدّام_الربّ