صبحية مع الرب - عيد التجلّي

بصباح هالعيد المجيد، بدنا نشكرك يا الله من كل قلبنا عا تجلّي الربّ يسوع اليوم للرسل، وعا حضورك الدايم معنا وبيناتنا بكل لحظة من لحظات حياتنا.

بدنا نشكرك يا الله الآب لأنّو بحدث التجلّي انشال القناع والحجاب اللي كان بيمنع الإنسان إنو يلتقي فيك إنت الإله ويشوفك.

منشكرك لأنّك إخترتنا، كل واحد وواحدة منا، وكشفتلنا بالربّ يسوع، الله الإبن، اللي كانو يشتاقو الأنبيا يشوفوه ويلتقيو فيه.

بدنا نشكرك يا يسوع لأنّك قبلت إنّنا نحنا نكون رسالتك عا هالأرض، وخليتنا قادرين عالخدمة بمحبّة مجّانية بقوّة الروح القدس.

بدنا نشكرك يا روح الله القدّوس لأنّك حوّلتنا من الموت للحياة معك.

منشكرك لأنّك عم بتكمّل عمل الله بحياتنا من خلالنا.

الك منّا كل التسابيح يا الله لأنّك جعلتنا أحرار، ودعيتنا على إننا نعرف كيف نختار الحقيقة فيك.


/الخوري يوسف بركات/