24 Feb
24Feb

ما أجملك يا إلهنا، وما أجمل الصباح اللي بتشرقو علينا، وما أجمل كلماتك اللي فيها منلاقي الحياة.

كل ممالك الأرض زايلة يا ربّ، وكل ملذّات الدني وقتيّة وما بتدوم إلاّ وقت قصير، وكل مجد العالم رح يبقى بالعالم وما حدا رح ياخد شي معو.

بيبقى حضورك يا ربّ هوّي الدايم، وحبّك هوي الغنى اللي بيزيد وما ممكن ينقص، والجلسة قدامك بالقربان هيي الملجأ الحقيقي لإلنا، وجسدك ودمك أطيب وألذّ غذاء لحياتنا.

كلنا ثقة فيك يا ربّ إنّك ولا لحظة بتتخلى عنّا، وإنّك بتعرف لشو نحنا بحاجة، ونحنا كلنا رجا إننا نحصل عالملكوت الأبديّ معك مطرح ما في السعادة الدايمة اللي ما بتخلص.

وطننا يا ربّي يسوع مش عا هالأرض، وطننا بالسما إنت حضّرتلنا ياه تا نكون بحضنك مع الأبرار والصدّيقين، وطننا الأبديّ فيه الحياة والسلام والفرح والمحبّة.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.