17 Nov
17Nov
إعلان خاص

منرفعلك يا ربّ كل التسبيح والمجد والسجود والحمد والاكرام عا كل انعاماتك علينا.

شو هيّن الحكم عالناس يا ربّ بإنّن ما بيعرفوك، متل ما كانو اليهود شايفين بحالن انّن وحدن شعب الله المختار ووحدن اللي بينالو الخلاص.

هيدا حالنا نحنا يا ربّ، منفكّر اننا وحدنا منعرفك ومنصير ندين غيرنا اللي عم يخطا متل كأننا نحنا اللي عنا القدرة على التمييز بين الخير والشرّ، ونصنّف الناس بالخانات عا ذوقنا.

بس نحنا مش عارفين اننا بتصنيفنا للناس هيك منكون عم ندين حالنا لاننا مننسى اننا منتصرف متلن واسوأ اوقات وانو كلنا متساويين بنظرك يا ربّ وانو الكل مدعو انّو يتعرف عليك ويفوت معك بعلاقة حب متبادل.

وحدك يا ربّ عندك سلطان الحكم، وروحك القدوس هوي الصديق الوحيد اللي بينصحنا تا ما نحكم عا حدا ونعيش المحبة تجاه كل انسان من دون أحكام.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.