صبحيّة مع الرب
بهالصباح المبارك، بسبّحك يا يسوعي الحبيب وبمجّدك وبعظّمك عا كل نعمك وعطاياك اللي بتفيضا علينا.
ما بتفاجأ يا رب لمن بقرا انو صار في جدل بين الرسل، لأنو ما في جماعة كاملة عالأرض.
كل إنسان او كل جماعة قررو يمشو معك ويسعو للكمال فيك، رح يتواجهو بالضعف وبالنقص اللي فيون عم بيحاولو يبعدوهن عن الطريق ويفشلولن مسيرتن معك.
بس التحدّي الكبير هوي انّك تبقى يا يسوع مثال الخادم قدام عيونن ويبقو ثابتين فيك.
والأهم عنا نحنا المؤمنين فيك يا رب هوي انّك حاضر بيناتنا وعم بتعلّمنا انو السلطة بيناتنا الها معنى ومفهوم مختلف كليّا عن اللي عم نعيشو أغلبيتنا بعالمنا اليوم.
وأجمل تعليم مناخدو منّك، انت الوديع والمتواضع، هوي قايم عالتواضع والتضحية وعالثبات قدام التجارب اللي منتعرضلا، والهدف هوي الحياة معك بالملكوت.
ورح نسعى دايماً انّو نضل ثابتين فيك من خلال عمل الخير بكل ايمان وتواضع ومحبة.
/الخوري يوسف بركات/
أضغط هنا... للإنتقال إلى صفحاتنا على سوشيال ميديا
