صبحيّة مع الرب


23 Jan
23Jan


صباح الصداقة الحقيقية هوي صباحي معك اليوم يا ربّي يسوع.

هالصداقة الحقيقية انت اللي بنيتا مع تلاميذك الأولين اللي دعيتن تا يتتلمذو عا ايديك، ويسمعوك، ويرافقوك بأعمالك وبصلواتك وبطريقة عيشك.

هالصداقة الحقيقية انت اللي بنيتا يا رب مع تلاميذك اللي ما كانو اصحاب مواهب خارقة، ولا حتى من الشخصيات المهمّة بالمجتمع، لا بل هنّي ناس عاديّين وأغلبيتن من الطبقة الفقيرة تا تأكّدلن وتأكّدلنا انّو القوّة اللي انعطيت لإلن تا يبشّرو فيك هيي من الله ومش منن.

هالصداقة الحقيقية اللي بنيتا مع تلاميذك يا ربّ خلّتن يحملو فكرك ويكونو رسلك وسفراءك، حاملين صفاتك تا يعلنو شريعتك، شريعة المحبّة، بحياتن وبحياة كل مين بيلتقي فيون.

نحنا كمان تلاميذك يا ربّ، عم نسعى دايما انّو نجاوبك عا طلب الصداقة اللي دايما عم تدعينا لإلها، تا نعرف نعكس صورتك وحبّك فينا وبالعالم.

/الخوري يوسف بركات/

أضغط هنا... للإنتقال إلى صفحاتنا على سوشيال ميديا

تعليقات
* لن يتم نشر هذا البريد الإلكتروني على الموقع.