بسبّحك وبمجّدك اليوم مع القديس أندراوس الرسول بيوم عيدو.
مع الرسول أندراوس ، اللي كان تلميذ يوحنا المعمدان، ولمّن شافك ترك معلّمو تا يلحقك لأنّو شاف فيك المعلّم الكامل، بدي أتبعك وحدك لأني فيك أنا كمان بلاقي الكمال يا ربّ.
مع أندراوس الرسول خيّو لبطرس واللي كانو صيادين سمك، ولمّن دعيتن تركو كل شي وتبعوك، بدي اترك كل شي بيعلّقني بالأرضيات وإتبعك لأني فيك بلاقي السلام.
مع أندراوس الرسول، اللي بشّر فيك بعيد عن أرضو وكان همّو الوحيد توصل لقلب كل إنسان ، بدّي كون عم وصّلك لكل إنسان بلتقي فيه.
مع أندراوس الرسول اللي فضّل إنّو يموت عالصليب متلك يا معلّو وإلهو، على إنّو ينكرك، بدي موت عن أنانيتي وشهواتي ورغباتي اللي بتحاول تبعدني عنّك وتعيّشني بضياع وحزن وألم.
مع أندراوس الرسول بدي كون منتمي لإلك وحدك يا إلهي وحبيبي يسوع.
/الخوري يوسف بركات/
