صبحيّة مع الرب


19 Oct
19Oct


صباح الحكمة المليانة ايمان هوي صباحك يا ربّي يسوع.

انت الحكمة يا يسوع، انت اللي دعيتنا تا نكون حكماء متل الحيّات وودعاء متل الحمام. 

وسرّ الحكمة اللي بتدعينا لإلها هوّي انّا نحطّ قدّامنا هدف واضح ونعطي كل ذاتنا تا نحقّقو. كيف تا اذا كان هالهدف انّو نعيش عا هالأرض مشروع قداستنا على رجا انّا نلتقي فيك بملكوتك السماوي؟

وأكيد، منعرف يا ربّ، انّو رح نواجه صعوبات كتير عا هالطريق، بس باتّكالنا عليك، وبتسليم ذاتنا للروح القدس، هالقبطان اللي ما ممكن يودّينا الّا لميناء الحياة الأبديّة وللفرح الدايم معك، منخطاها.

اعطينا يا ربّ، اليوم وكلّ يوم، انّو نكتشف الحكمة مطرح ما هيي، ولو حتى بالشرّ، تا نقدر نوجّها صوبك، ونترجما فعل حبّ لإلك ولإخوتنا. وهيك منكون عم نبني درج ما بينكسّر ولا بيتهدّم تا نوصل لعندك ونفرح بلقاءك.


/الخوري يوسف بركات/

تعليقات
* لن يتم نشر هذا البريد الإلكتروني على الموقع.