مع إطلالة هالصباح المبارك، بسبّحك يا إله الحقّ، ربي وإلهي يسوع المسيح.
بيلفتلي نظري اليوم، يا ربي يسوع، الحوار بينك، إنت الملك السماوي، وبين بيلاطس الملك الأرضي ، بين مملكتك مملكة السما وبين مملكتو مملكة العالم.
مملكتك يا يسوع هيي مملكة الحق، بينما مملكة العالم هيي مملكة الكذب.
لهيك كنت دايماً تقول الحق، وولا شي غير الحق لأنك إنت الحق والحقيقة.
لهيك رفضوك ورفضو تعاليمك لأنن كانو عايشين بالكذب عالناس وعا الله ورفضو الحقيقة.
اليوم عم بطلب منّك يا ربّ إنّك تطهّر لساني تا قول الحق مهما واجهتني الصعوبات تا أقدر عيش حريّة أبناء الله بمملكة هالعالم الزايل.
/الخوري يوسف بركات/
