الله معك...


بيخبّرو عن رجّال عمرو تسعين سنة، عانى من مشكلة مَيّ زرقة على العين، وما عاد قادر إنّو يشوف.

قرَّر يزور الطبيب يلّي إقترح عليه إنّو يعملّو عمليِّة.

أكيد الرِجَّال وافق لحتَّى يتخلَّص من الألم ويرجعلو البصر.


خلصِت العمليِّة وتكلَّلت بالنجاح.

الطبيب بيتقدَّم من المريض وبيعطيه الوصفة الطبِّيِّة، وكتبلو الإذن بالخروج من المستشفى، وسلَّمو الفاتورة يلّي لازم يدفعها.

بلّش المريض يبكي، بيقلّو الطبيب إذا الفاتورة غالية ممكن إنّو نعملّك حسم تَ يصير السعر يناسبك، جاوب الرِجّال يلّي عَم يبكي :

«مش الفاتورة، عَم إبكي لأنُّو الله عطاني نعمة البصر لتسعين سنة وما طلب مِنّي إدفع أيّ فاتورة بدل نعمة البصر وأنا ما كنت عَم قدِّر هالنعمة».





الزوّادة بتقلّي وبتقلّك :



الربّ عطانا نِعَم كتيرة وبكل مجَّانيِّة، بسّ مع الأسف ما منعرف قيمتها إلّا ما نِفقِدها، صحيح القول يلّي بيقول :

الصحة تاج على روس الأصحَّاء ما بيعرف قيمتها إلَّا الناس المرضى، والله معك.

المصدر : صوت المحبّة