الله معك...


بيخبّرو عن الأم تريزا دو كالكوتا إنّو بيوم من الإيّام كانِت عَم تتمشّى بشوارع كالكوتا الأكتر فقرًا، سِمعِت أنين بالقرب من كومة من الزبالة، قرَّبِت صوب الصوت راهبة من راهباتها وكانت الصدمة : صبيِّة مُصابة بمرض البَرَص مكبوبة بالقرب من الزبالة، عَم تزحف لحتَّى تفتِّش عن شي تاكلو.

بسرعة الأم تريزا وبمساعدة الراهبة بتحملها وبتاخدها على المصحّ التابع لمدينة السلام، بتهتمّ فيها وبتحاول تداويلها القروح يلّي بجسمها.

البنت بتسأل الأم تريزا :

«ليش عَم تهتمّي فيّي بوقت يلّي أهلي كبّوني بالشارع»؟

جاوبتها الأمّ تريزا :

«لأنّو يسوع بيحبِّك ومات كرمالي وكرمالِك على الصليب». 

بيطول الحوار، وبالنهاية طلبِت الصبيِّة إنّو تتعرَّف على المسيح وتنال سِرّ العماد، وبشهادة الكلّ قبل ما تنتقل لديار الربّ الكلّ سمعوها عَم تقول :

«يسوع بشكرك على حُبَّك، إنتَ يلّي حبَّيتني وبذلت ذاتك كرمالي على خشبة الصليب».




الزوادة بتذكّرني وبتذكّرك :

بِقَول الربّ يسوع :
«كل يلّي بتعملوه مع أحد إخوتي الزغار معي أنا بتكونو عَم تعملوه»، والله معك.

المصدر : صوت المحبّة