الله معك...


في بِنت زغيرة كانت كل يوم تروح وتِرجَع من المدرسة تِمشاية.

بيوم من الإيَّام، بتتلبَّد السما بالغيوم، وبتبلِّش بعد الضهر عاصفة بَرق ورَعد.

إمّ هالبِنت بينشِغِل بالها، وبتفكِّر قدَّيش بِنتها رَح تكون خايفة من هالعاصفة.

بتِطلّع بالسيارة وبتروح تَ تجِيبها عالبيت.

عالطريق، بتشوف البِنت من بعيد، كل ما يِلمَع بَرق، تِطلَّع البِنت بالسما وتتضحَّك.

تكرَّر المشهَد كذا مَرّة.

بتعَيّطلها الإمّ وبتطلِّعها بالسيَّارة وبتسألها :

«شو كِنتِي عَم تَعملي كلّ شوَي»؟

بتجاوِب البنت ببراءة وبتقول :

«الله كان كلّ شوَي عَم بيصَوِّرني! تَ تِطلَع الصورة حِلوة، كنت عَم بِتطلَّع فيه وإتضَحَّك».




الزوّادة بتقلّي وبتقلّك :


بِعواصِف الحياة، تَ تصير الصورة حِلوِة، خَلّونا نتطّلع بألله ونضحَك. والله معك.

المصدر : صوت المحبّة