الله معك...


بيخبّرو عن بنتَين رِفقة بالمدرسة بس مع الأسف وِحدة من بيت غني والتانية من بيت فقير.

بيوم من الإيَّام بتقول البنت الغنيِّة للفقيرة :

«إمّي أغنى من إمِّك، مبارح إمّي إشترت سيّارة جديدة، واليوم جابت موظَّفة جديدة لحتَّى تنضُّفلنا البيت، وإستاذ لحتَّى يدرِّسنا، ومُمرِّضة تسهر علينا لمّا منمرض، وطبَّاخ لحتَّى يحضِّرلنا أطيب الأكلات».

بتقاطعها البنت الفقيرة وبتقلّها :

«نحنا إمّي هيّي يلّي بتحضِّرلنا الأكل، وبتسهر علينا لمَّا نمرض، وبتدرِّسنا كلّ يوم بس نرجع على البيت، بتشتريلنا التياب الجداد وبتخبّي من قدّام عيونّا حذاءها الممزَّق، بعتذر يا رفيقتي إمِّي أغنى بكتير من إمِّك هيدا هوّي الغِنى الحقيقي».




الزوّادة بتقلّي وبتقلّك :


الغِنى مش بشو منملُك، الغِنى كيف منتصرَّف بيلّي منمِلكو، والله معك.

المصدر : صوت المحبّة