الله معك...
زوّادة اليوم قصَّة حقيقيِّة مِن ألمانيا...
بيوم من الإيّام كان في بنت زغيرة ناطرة مع بَيها بمحطة التران، بتشوف شبّ مربَّط بسلاسل حديد بتسأل بَيها :
«هيدا مين؟»
بيجاوبها :
«خاطي مجرم آخدينو حتَّى ينفِّذ حكم السجن المؤبَّد».
البنت بتتأثَّر كتير بهالمشهد وبتتذكَّر كلام الإنجيل إنّو الربّ إجا كرمال الخاطيين حتَّى يخلِّصُن، بتترك بَيها وبتروح صوب المجرم وبتقلّو :
«ما تخاف الربّ يسوع بيحبَّك»
بيتطلَّع المجرم فيها بغضب، بسّ البنت الزغيرة بتقلّو للمرّة التانية :
«ما تخاف يسوع بيحبَّك»
وبترجع لعند بَيها.
المسا لـمّا وُصِل المجرم ع الحبس، حطّوه بأوضه كِلّا عتمة، وهون بلَّش يفكِّر كيف ممكن الربّ يسوع يحبّ واحد مِتلو وبعد صراع طويل بينو وبين حالو، بيسمع صوت جوّاتو بيرجّعو لإيّام الطفولة بيقلّو :
«نعم الربّ بيحبَّك وكرمال هيك مات ع الصليب كرمال خلاصك».
ساعتها بيركع ع الأرض وبيصرخ :
«يا ربّي يسوع أنا بحبَّك وأنا متل لصّ اليمين بطلب مِنَّك تذكرني اليوم بملكوتك».
الزوّادة بتقلّي وبتقلَّك تذكَّر كلام الربّ :
«مش الأصُحّا بحاجة للطبيب إنّما المرضى، كتار يلّي بيحكمو ع الخاطيين بس قلال يلّي بيرحموهُن... حاول تشوف بعيونك وترحم بقلبك».
المصدر : صوت المحبّة
