الله معك...
بيخَبرو عن مَرا بشرتها بَيضا، كانِت مسافرَة بالطيّارة من جوهنسبورغ عَ لندن وحاجزة تذكرة سفر بالدرجة السياحيِّة، وكانِت قاعدِة حدها مرا بشرتها سودا، بتعترض المرا البَيضا عند المُضيفة وبتقِلاَّ :
«أنا ما بقعد حَدّ إنسانة أقلّ منّي بالمركز».
بتفتّش المُضيفة ع مطرح فاضي بس مع الأسف ما بتلاقي، بتضلّ هالمرا البيضا مُصِرَّة ع قرارها، المُضيفة بتُطلُب المُساعدة من الكابتن... بعد شوي بتتقدَّم المُضيفة من المرا البيضا وبتقِلّها :
«منعتذر منِّك ع الإزعاج يلّي سبَّبنالِك ياه».
القصّة ما خُلصِت هون... بتتوجَّه المُضيفة للمرا صاحبة البشرة السودا وبتقلها :
«تفضَّلي غيري محلِّك، الكابتن بيقَدِّملك كرسي بالدرجة الأولى».
الزوّادة بتقلّي وبتقلَّك :
«مين رَفَع نفسو اتَّضَع، ومين وَضَع نفسو ارتَفَع».
المصدر : صوت المحبّة
